ማዘን አብዱልሁሴን በሊባኖስ ሃገር እውቅና ያለ ጠበቃ እና በያርዜ አከባቢ “ላየንስ ክለብ” ተብሎ የሚጠራው የግብረ ሰናይ ድርጅት ዋና ሃላፊ ነበር። የግሉ የፌስቡክ ገጹን ከፍቶ የጎበኘ ሁሉ ሲመለከተው አቶ ማዘን በማህበረሰቡ እውቅና ያተረፈ በጎ ስራዎች በመስራት እና የተቸገረውን በማገልገል የሚታወቅ ቅን ሰው ሊመስለው ይችላል። ነገሩ ግን እንደዛ አይደለም።

የጠበቃው ማዘን አብዱልሁሴን ወላጅ አባት በሊባኖስ እውቅና ያላቸው ዳኛ ሻፊቅ ቃሲም አብዱልሁሴን ይባላሉ። እንደ ድርጅታችን ጥርጣሬ ከሆነ ሰውየው የዳኛ ልጅ በመሆኔ ለምፈጽመው ማንኛውም ወንጀል ተጠያቂ አልሆንም ብሎ ያምናል።

በቤቱ ብዙ የተሰቃየችው ኢትዮጵያዊቷ የሰው ቤት ሰራተኛው አበባ* ትባላለች። ለድህንነቷ ስንል ትክክለኛ ስሟን አልገለጽንም። አበባ በዚህ ሰውዬ ቅጥር 4 ዓመት ከ7 ወራት አሳልፋለች። በዚህ የ4 ዓመት ከ7 ወራት ቆይታዋ አበባ በቤይሩት እና በሃማና ያሉ ቤቶቹ ነበር የምትሰራው። በአሰሪዋ ማዘን አብዱልሁሴን ሁለት ግዜ ጾታዊ ጥቃት ሲፈጸምባት አንድ ግዜ ደግሞ አስገድዶ ደፍሯታል።

የአበባ እህት አበባ ይደርስባት የነበረው በደል እጅግ በጣም ሲያጨናንቃት ግዜ ወደ ድርጅታችን “ይህ ነው ሊባኖስ” መልዕክት አድርጋ የእርዳታ ጥሪ አድርሳልን ነበር። እኛም የአበባን ሁኔታ መከታተል ጀመርን። በ2010 ዓ.ም ነበር አበባ በማዘን ቤት ስራ የጀመረችው። ለአንድ ዓመት ያህል ስራ ሰርታ ከዓመት በኋላ ማዘን አብዱልሁሴን ደሞዝ ላለመክፈል ወሰነ። በተጨማሪም አበባ ከቤተሰቦቿ ጋር የነበራት የስልክ ግንኙነት እንዲቋረጥ አድርጎ ቤተሰቦቿ ለዓመታት አበባ የት እንደገባች የሚያውቁት ነገር ባላመኖሩ በሀዘን በጭንቀት ተወጥረው ነበር።

ሁለት ዓመት ሙሉ አበባ ከቤተሰቦቿ ጋር ምንም አይነት ግንኙነት አልነበራትም። “እያለቀስኩ እለምነው ነበር አሰሪዬን። ቢያንስ ለሁለት ደቂቃ እንኳን እህቴ ጋር ደውዬ አለሁ ልበላት እንዲተነፍሱ። ግን እሱንም ይከለክለኝ ነበር።” ትላለች አበባ።

በመጋቢት 2012 ዓ.ም የአበባ እህት ወደ ድርጅታችን መልዕክት ከማድረጓ ጥቂት ወራት በፊት አበባ ስልክ እንድትደውል ተፈቀደላት። የተፈቀደላት ደግሞ አበባ ሄዳ ለማዘን እናት “ቤተሰቦቼን እንዳነጋግር ካልፈቀድሽልኝ እራሴን አጠፋለሁ” ብላ በመዛቷ ምክንያት እንደነበረ አበባ ታስረዳለች።

በኋላ ባጠፋችበት ማግስት ምን ሲገጥማት እንደነበር አበባ ለእህቷም ለድርጅታችን አስረድታለች። ያለደሞዝ ከመጉላላት በተጨማሪ ለጾታዊ ጥቃት መዳረጓን ገልጻለች።

“አንድ ምሽት ስራ ጨርሼ በመኝታ ክፍሌ ተኝቼ እያለሁ ማዘን የምተኛበት አልጋ ላይ ወቶ ልብሴን ማውለቅ ጀመረ። ከእንቅልፌ ስነቃ አይቼው በድንጋጤ ጮኩኝ።” ማዘን ተነስቶ ጥሏት ሄደ። ከዚህ በኋላ ባደረባት ፍርሃት እና ጭንቅ ምክንያት ድጋሜ ተመሳሳይ ነገር እንዳይገጥማት ስትል ልትተኛ ስትል አራት ልብስ ደራርባ መተኛት ጀመረች። ፍርሃቱና የመንፈስ ጭንቀቱ ተደራርቦ በራስ ምታት ትጠቃ ነበር። ማዘን አብዱልሁሴን ባለ ትዳርና የ4 ልጆች አባት ነበር። አበባ ስለተፈጠረው ነገር ግን እዛው ቤቱ ውስጥ ለምትኖረው የማዘን ባለቤት ማውራት ፈራች። ለሀገሪቱም አዲስ ነበረሽ ቋንቋውን መናገር ያስቸግራት ነበር። ሌላ ነገር ተረድታ እሷ ላይ ድብደባ እንዳትፈጽም በመፍሯቷ ዝምታን መረጠች። ቤቱ እየተቆለፈባት ስለሚወጡ ከቤቱ ማምለጫ አጥታ ታፍና ተቀመጠች። በተጨማሪም የማዘን እናት አንድ ህንጻ ጎረቤት ሆነው ይኖሩ ስለነበር እና የህንጻውን ጽዳት ሰራተኛ እዛው በመኖሩ ሁለቱ አበባን ይከታተሏት ነበር በተለይ ማዘን ለስራ ወይ ለመዝናናት ቤቱን ጥሎ ከሄደ። ይሄ ከቤቱ አምልጦ ለመጥፋት አስቸጋሪ አደረገው። 

ከተወሰነ ወራት በኋላ ማዘን ከባለቤቱ ጋር ትዳሩን አፍርሶ መለያየታቸውን ታስታውሳለች። አበባ በቤቱ ከማዘን እና ከአራት ልጆቹ ጋር ቀረች። ከሰኞ እስከ አርብ ልጆቹ በቤቱ ይገኙ እና ቅዳሜ እና እሁድን ከእናታቸው ጋር ያሳልፉ ነበር። ቅዳሜ እና እሁድ አበባ ለብቻዋ ከማዘን ጋር ነበር የምትኖረው። ማንም ስላልነበረ በማዘን ይፈጸም የነበረ ጸያፍ ድርጊት እየተባባሰ መጣ።

እርቃኑኑ ሆኖ ወይ ፓንት ብቻ ለብሶ አበባ ባለችበት በቤቱ ይመላለስ ነበር። አንድ ግዜ አበባ ገላዋን እያጠበች እያለች ማጠብያው ውስጥ ገብቶ “እኔ ላሳጥብሽ” ብሎ ይነግራታል። እሷ አልቅሳ ከጮኸች በኋላ ወጣ። እንዲህ አይነት ነገር በተደጋጋሚ ይከሰት ስለነበር አበባ በየቀኑ ተጨናንቃ ላለመደፈር ጥንቃቄ እያደረገች ትኖር ነበር።

ሌላ ቀን ደግሞ አሳድ የተባለው የማዘን ወንድም ለጉብኝት መጣ። አሳድ አላገባም ከእናቱ ጋር ነው የሚኖረው። “ማንም በሌለበት ለብቻዬ ቤቱን እያጸዳሁ እያለሁ አሳድ ብቅ አለ። ከኋላዬ መጥቶ እጆቺ ጡቶቼ ላይ አሳርጎ ወደ

መሬት ጎተተኝ። ሱሪዬን ለማስወለቅ ሞከረ። እጅግ በጣም ነበር የደነግጥኩ። ጎረቤት ሰምቶ እንዲሸሸኝ ብዬ ጮክ ብዬ ማልቀስ ጀመርኩ። ከዛ ተነስቶ ቤቱን ጥሎ ወጣ።”  

ከተወሰነ ግዜ በኋላ ለሁለተኛው ግዜ ወንድምየው አሳድ ተመልሶ መጣ። “ከሰዓት በኋላ ነበር። ማዘን ስራ ነበር። እናታቸው ደግሞ ሌላኛዋ ልጃቸውን ለመጠየቅ ሄደው ማንም በሰፈሩ አልነበረም። አሳድ ይሄን ወቅት ጠብቆ ወደ ቤቱ መጣ። እኔ ብቻዬን ነበርኩ። መስኮቶቹን ሳጸዳ ነበር። ጉልበቱ ከአቅሜ በላይ ነበር። ገፍትሮኝ ወደ ሶፋው ወሰደኝና ደፈረኝ። ከተደፈርኩ በኋላ ቀኖቼን ከጠዋት እስከ ማታ በማልቀስ ነበር የማሳልፋቸው።”

“አንድ ወር አልፎ በተጠበቀ ወቅት የወር አበባዬ አልመጣ አለ። ከአቅሜ በላይ ሆነና ወደ እናትየው ሄጄ የተፈጠረው ሁሉ አስረዳኋቸው። እናትየው ፋርማሲ ሄደው የእርግዝና ምርመራ መሳርያ ገዝተው መጡና እንዴት እንደምጠቀምበት አስረዱኝ። ተጠቅሜበት ውጤቱን አይተው “ወጤቱ ጥሩ አይደለም” ሲሉኝ ጊዜ ምርር ብሎኝ አነባሁ።”  

“አንድ ቀን የማዘን ልጆች ሳለቅስ አዩኝ። “ምን ሆነሽ ነው?” ብለው ጠየቁኝ እኔ ምንም አላልኳቸውም። በኋላ አንደኛው ልጅ ሄዶ ለእናቱ ማልቀሴን ነገራት። እናቱ (የማዘን አብዱልሁሴን የቀድሞ ሚስቱ) “ለምን ታልቅሻልሽ?” ብላ ጠየቀችኝ። እኔም በቀድሞ ባሏና በወንድሙ የደረሰብኝ ነገርኳት። እሷ ሄዳ የሆነ መድሃኒት አምጥታልኝ ከብዙ ሻይ እና ውሃ ጋር እንድወስደው መከረችኝ። የሰጠችኝ መድሃኒት ወስጄ ለሁለት ወይ ለሶስት ቀናት ብዙ ደም አፈሰስኩ። በዚህ መንገድ ማስወረዴን ተረዳሁ።” 

ከድርጅታችን “ይህ ነው ሊባኖስ” አንዱ ተወካያችን ወደ ማዘን ደውሎ አበባን ነጻ ለማስለቀቅ ደውሎ መደራደር ጀመሩ። ከአበባ መረዳት እንደቻልነው በሊባኖስ ካለው የኢትዮጵያ ቆንስላ ወደ አበባ ሲደወል ማዘን “በአረብኛ ብቻ አውሪ” ብሎ ያዛት እንደነበር እና “በኢትዮጵያንኛ ስታወሪ ከሰማሁሽ ስልኩን እቀምሻለሁ” ይላት እንደነበረም አካፍላናለች። ማስጠንቀቅያም ለቆንስላውም ልኳል።  

የድርጅታችን አደራዳሪዎች በደሞዟ ጉዳይ ጥያቄ ባነሱ ግዜ ስለ ደሞዟ “የመጠየቅ መብት የላችሁም” ብሎ ነገረን ማዘን። የመኖሪያ ሰነዶቿን አሳድሰሃል ወይ ለሚለው ጥያቄም በተመሳሳይ “ስለዚህ ነገር የማንሳት መብቱ የላችሁም” አለ። አበባ በቤቱ ደስተኛ ሆና ትኖር እንደነበርና ከሱ ከልጆቹ እና ከእናቱ ጋር ተግባብታ እንደምትኖር ገለጸልን። በኋላ ከብዙ ግፊት በኋላ በደሞዟ ጉዳይ “የተወሰነ” ገንዘብ እንዳልተከፈላት ገልጾ ይሄ የሆነው “በስምምነት” እንደሆነና ወደፊቱ ቀሪውን ገንዘብ በእጇ እንደሚሰጣት ነገረን። ባለፉት 7 ዓመታት የድርድር ስራችን ይሄን አይነት ውሸት መስማቱን ለምደነው ሁኔታዋ አስጊ እንደሆነ መረዳት ቻልን።

የአበባ ቤተሰቦች በጭንቀት በሃዘን እና በናፍቆት ተወጥረው ልጃቸው ወደ ሀገሯ እንድትመለስ እንደሚፈልጉ ነገርነው ማዘን አብዱልሁሴንን። ስልክ ጆሮ ላይ ዘጋብን። ከዚህ በኋላ የድርጅታችን አደራዳሪዎች ወደ ማዘን ወይ ወደ እናቱ ስልክ ብንሞክር ሳያንነሱ ወይ እያነሱ ጆሮ ላይ መዝጋት ሆነ ደንባቸው።

የአበባ ደሞዝ ከፍያታለው ብሎ ስለነበረ የድርጅታችን ተወካዮች ገንዘቡን የላከበት የዝውውር ደረሰኝ እንዲያሳየን ጠየቅነው። ማዘን ለመተባበር ፍቃደኛ አልሆን አለ። በተጨማሪም በድርጅታችን ላይ ክስ እመሰርታለሁ ብሎ መዛት ጀመረ። 

የአበባ እህት ጭንቀቱ ከአቅሟ በላይ ሆኖ እሷም በተደጋጋሚ ወደ ማዘን እየደወለች እህቴን ልቀቅልኝ ብላ ትለምነው ጀመር። እህትየው በምትደውል ግዜ ማዘን እጅግ በጣም ይናደድ እንደነበር እና ሙልጭ አድርጎ ተሳድቦ አበባ ወደ ሃገሯ እንደማትመለስ ይነግራት እንደነበር እህትየው እንባ እየተናነቃት አካፍላናለች።

በታኅሳስ 2014 ድርጅታችን “ይህ ነው ሊባኖስ” ማዘን አብዱልሁሴን አባል ወደ ሆነበት የቤይሩት የጠበቆች ባር ማህበር ጥቆማ አድርገን ተቋሙ ጉዳዩን መከታተል ጀመረ። የአበባ ስቃይ ቀጠለ።   

በጥር 2014 የአበባ እህት ሊባኖስ ወደ ሚገኘው የ”ካፋ” በጎ አድራጎት ድርጅት የእርዳታ ጥሪ አስተላለፈች። ካፋ ወደ ፖሊስ ጥቆማ አድርገው የካፋ ሰራተኞች ከፖሊስ ጋር ሁለት ግዜ ወደ ማዘን ቤት ቢሄዱም አበባን ሳያገኙ ቀሩ። በኋላ ካፋ በማዘን አብዱልሁሴን ላይ ክስ መሰረቱ።

አበባ አልፎ አልፎ ቤተሰቦቿን ለማነጋገር ይፈቀድላት የነበረው አጭር የስልክ ደቂቃ ቀምቷት ጥፍት አለች። ሁኔታዋ ለአደራዳሪዎቻችን እጅግ በጣም አሳሳቢ ደረጃ ላይ ደረሰ።

የካቲት 4 ቀን 2014 ዓ.ም አበባ ከአስሪዋ ቤት አመለጠች።

በሩን ለመቆለፍ ረስቶ መውጣቱን አይታ ምንም ሳትዘገይ በሩን ከፍታ ከአከባቢው ጠፋች። እንደወጣች በሰው ስልክ እህቷ ጋር ደውላ ከቤቱ መውጣቷን አስረዳቻት። እህትየው ለካፋ ድርጅት ያለውን ነግራ የካፋ ሰራተኞች ደረሱላት። አበባን ይዘዋት ወደ ፖሊስ ጣብያ ሄደው የደረሰባትን በሙሉ አስረዱ። ይሄን ያደረጉ በኋላ ሃሰተኛ የስርቆት ክስ እንዳይቀርብባት በሚል ነው። ከዛ ወታ ካፋ ወደሚያስተዳድረው መጠልያ ገባች።  

አበባ ከቤቱ መሰወሯን የተረዳው ማዘን አብዱልሁሴን እጅግ በጣም ተናደደ። ወደ ድርጅታችን ስልክ ደውሎ ክስ እንደመሰረተብን አስረዳን። ከላይ ያለው ሰነድ እንደሚገልጸው ማዘን አብዱልሁሴን በ ይህ ነው ሊባኖስ ክስ የመሰረተበት ዋንኛው ምክንያት ድርጅታችን በግሉ ጉዳይ ጣልቃ በመግባቱ አበባ እንድታመልጥ እና ከቤቱ 3 ሺህ የአሜሪካ ዶላር 5 ሚሊየን የሊባኖስ ሊራ እና ከፍተኛ ዋጋ ያላቸው ጌጣጌጦች ዘርፋ እንድታመልጥ እኛ አግዘናታል ብሎ ስለሚያምን ነው። ለዚህ የፈበረከው የውሸት ክስ ተጎጂ ነኝ በሚል “ይህ ነው ሊባኖስ ላደረሰብኝ ጉዳትና እንዲፈጸምብኝ ላመቻቸው ስርቆት እስከ 100 ሺህ የአሜሪካ ዶላር ካሳ ክፍያ ይገባኛል” ብሎ ሊባኖስ ላለ ፍርድ ቤት ጥያቄ አቅርቧል

አበባ በካፋ ድርጅት ሰራተኞች እገዛ ጉዳይዋ ወደ ፖሊስ ብታስተላልፈውም ፍትህ ሳታገኝ ቀረች። በመጠልያው በነበረችብት ወቅት የሊባኖስ የመንግስት ድህንነት አባላት ለማዘን አብዱልሁሴን መልዕክት አድርገው ወደ ቢሮአቸው እንዲመጣ ጥሪ ቢያደርጉለት ምንም አይነት ምላሽ ሳይሰጥና ሳይመጣ እንደዘጋቸው አበባ ለድርጅታችን አስረዳችን። የሊባኖስ ፖሊስ እንደልማዱ በስደት ላይ ላሉ የሰው ቤት ሰራተኞችን ጉዳይ ችላ አድርገው በመሰዳቸው ምክንያት ሄደው አሳስረው ለህግ እንዲቀርብ እርምጃ ከመውስደ ተቆጠበ።

አበባ ተስፋ ቆረጠች። 9 ወራት ተኩል በመጠልያው አሳልፋ ኅዳር 2 2015 ዓ.ም ባዶ እጇ ወደ ኢትዮጵያ ተመለሰች። ማዘን አብዱልሁሴን የአበባን ፓስፕርት ለመመለስ ፍቃደኛ ባለመሆኑ ምክንያት አበባ ከኤምባሲ በተቀበለችው ”ሌሴፓሴ” ለመሳፈር ተገደደች።

አሁንም በአሰሪዋ ላይ የተመሰረተው ክስ አልተቋረጠም። ግን ሊባኖስ ያለው ዘረኛ ጨቋኝ የፍርድ አሰራር የሰው ቤት ሰራተኞች ፍትህ እንዳያዩ ምክንያት ሆኖ አበባ ያልተከፈላት ደሞዟን የመቀበል እድሉ በጣም ጠባብ ነው። ማዘን አብዱልሁሴን ለአበባ ያልከፈለው ተደምሮ በአጠቃላይ ወደ 10 ሺህ 400 የአሜሪካ ዶላር እዳ አለበት።

አበባ በሃገሯ እየኖረች ሊባኖስ እያለች የተፈጸመባት ጥቃት ክፉና ጎድቷታል። አሁንም እንቅልፍ መተኛቱ በጣም ነው የሚያስቸግራት። 

ድርጅታችን “ይህ ነው ሊባኖስ” በቤይሩት ከተማ የሚገኘው የቤይሩት ጠበቆች ባር ማህበር ማዘን አብዱልሁሴንን ከአባልነት እንዲያሰናብቱት ጥሪ እናስተላልፋለን። የሊባኖስ ሀገር ጠበቆችን ስም የሚያጠፋ አስነራዊ ጸያፍ ሰው ነው።

ድርጅታችን “ይህ ነው ሊባኖስ” የአበባ ክስ በሊባኖስ ፍርድ ቤቶች በአፋጣኙ እንዲታይላትም ጥሪ ያስተላልፋል። የሰው ቤት ሰራተኞች ፍትህን እንዲያዩ ለበርካታ አመታት ተጉላልተው እንዲጠብቁ የሚገደቡበት ሁኔታ መኖር የለበትም። ፍትህን ማዘግየቱ ፍትህን ከማጓደል ያላነሰ ነው።