ኤሊያን ኩሪ በሊባኖስ የምትኖርና በማህበራዊ ድረ ገጾች ዝና ያፈራችና በቲክ ቶክ ወደ ግማሽ ሚሊየን ተከታዮች ያላት አቀንቃኝ ናት። ሊባኖሳዊቷ ኤሊያን በቲክቶክ በርካታ አዝናኝ ቪዲዮችን በማሰራጨት ሲታወቁ በምታሰራጫቸው ቪዲዮዎች መካከል በቤቷ ተቀጥራ ትሰራ የነበረችው ኢትዮጵያዊቷ የሰው ቤት ሰራተኛዋ ገነት ሙሊሳ ቄጫ በብዙዎቹ ትታያለች። ሁለቱ ተዝናንተው እየተሳሳቁ በሚታዩባቸው የቲክቶክ ቪዲዮዎች የሁለቱን ጥብቅ ቅርርብ የሚገልጹ ይመስላሉ። ኤሊያን ካሰራጭዋቸው ቪዲዮች መካከል ለገነት ያላቸው ፍቅር በዜማ የሚገልጹበት እና ገነት ጥላኝ ብትሄድ ተቋቁሜ መቀጠሉ ይከብደኛል ብለው የሚገልጹበት አዝናኝ ዘፈንን ያካተቱ ቪዲዮዎች አሉ። 

ጥር 25 እለት 2015 ዓም ኤሊያን በሊባኖሱ አል ጀዲድ ቲሌቪዥን የሚዘጋጅ ፕሮግራም ላይ በቀረቡ ወቅት ገነትን ይዘው ነው ፕሮግራሙ ላይ የቀረቡት ። የፕሮግራሙ አዘጋጅ በበርካታ ሚሊዮን ሰዎች ስለታዩ የኤሊያን እና የሰራተኛዋ ገነት አዝናኝ ቪዲዮዎች ሃሳባቸውን ገለጹ። የፕሮግራሙ አቅራቢ ቪዲዮዎቹ “የፍቅር እና የሰብዓዊነት መልዕክቶች ያስተላለፉ ናቸው” ብለው ተናገሩ። ስለሁለቱ መቀራረብ የፕሮግራሙ አዘጋጅ ለኤሊያን ጥያቄ ባነሱበት ወቅት ኤሊያን የሚከተለውን ተናገሩ፤

“ገነት ያለፉት 5 ዓመታት ከኔ ጋር አሳልፋለች። እኔ እንደ እህቴ አድርጌ ነው የማያት። ለ5 ደቂቃ እንኳን ከጎኔ ብትርቅ እንደጠፋሁ ኣድርጌ ነው የሚሰማኝ!”

በመጨረሻ የፕሮግራሙ አዘጋጅ ለኤሊያን ምስጋናቸውን አቅርበው በሊባኖስ ለሚቀጠሩ የሰው ቤት ሰራተኞች አክብሮት እና ፍቅር በማሳየት ለሌሎችም ትምሳሌት እንደሚሆኑ ለተመልካቹ አስረዱ። የአል ጀዲድ ቴሌቪዝን ስርጭቱን ለተከታተሉና በቲክቶክ የኤሊያን ቪዲዮዉችን ለሚከታተል ሰው ገነት በዛ ቤት በመቀጠሯ እድለኛና ደስተኛ ሆና እንደምትገኝ ሊመስላቸው ይችላል። ከሳቁ ጀርባ ኤሊያን ኩሪ ተደብቆ እንዲቀርላቸው የሚፈልጉ የቤቱ ምስጢር አለ፤ የቤት ሰራተኛዋ ላይ እየዛቱ ለባርነት አጋልጠዋት ነበር።

በጥቅምት 2015፤ የአል ጀዲድ ፕሮግራም በቴሌቪዥን ከተላለፈ ከ8 ወራት በኋላ በኤሊያን ኩሪ ቤት ተቀጥራ ትሰራ የነበረችው ሰራተኛዋ ገነት ሙሊሳ ቄጫ ወደ ትውልድ ሀገሯ ትመለሳለች። እኛም ገነትን አግኝተናት በቤቱ ስላሳለፈችው ግዜ በሰፊው አወያይተናታል። እንደ ገነት አገላለጽ ኤሊያን ለቲክቶክ ተመልካቾቻቸው ያስተላልፉ የነበሩ ቪዲዮዎች የቤቱን እውነተኛ ሁኔታ ፈጽሞ የማይገልጹ ነበሩ።

ገነት ታፍና በቤቱ ተቆልፎባት ለቀናት የእስረኛ ኑሮ ከመኖር ጀምሮ የአካላዊ ድብደባ በተደጋጋሚ ይፈጸምባት እንደነበረ ትገልጻለች። ያለ ደሞዝ በግድ እንድትለፋ እየተደረገች በቤቱ የሚቀርብላትን ምግብ እያሳነሰች እንደምታበላትም ገነት አካፍላናለች። በቤቱ ባሳለፈችው ግዜ ምንም ነገር አቅርበውላት እንደማያውቁ ግን አልፎ አልፎ ያረጀ ቀዳዳ ልብስ ወይ ጫማ ይሰጣት እንደነበረ ገልጻልናለች። ቤተሰቦቿን በስልክ ማነጋገር ከስንት ልመና በኋላ ነገር የሚፈቀድላት የነበረው። እስከ 6 ወራት ቤተሰቦቿን በስልክ ለማነጋገር ትከለከል እንደነበረም ትናገራለች። ስልክ በሚፈቀድላት ወቅት ደግሞ “አጠገቤ ቆመው አንገቴ ላይ እየተነፈሱ ነበር የሚያስደውሉኝ።” 

ገነት 4 ዓመት ከ8 ወራት ነበር በኤሊያን እና በሊባኖስ ጦር ሰራዊት የጦር አዛዥ በሆነው ባለቤታቸው ጆኒ ዳውድ ቤት ያሳለፈችው። በቤቱ አብዛኛው ግዜዋን ያሳለፈችው ያለ ግል ስልክ ሲሆን ቤቱን ልትለቅ ስትል ስልክ እንደተፈቀደላት ትናገራለች። ስልኩ ላይ ግን ጥብቅ ክትትል ያደርጉ ነበር። በየቀኑ ስልኩን ወስደው እየፈተሹ የድምጽ መልዕክቶቹን እየወሰዱ በሰው አስተርጉመው ያዳምጧቸው ነበር። በዚህ ሁኔታዋ ገነት ስልክ ይዛም ተስፋ ቆርጣ በፍርሃት ትኖር እንደነበር ትናገራለች።  

ለዓመታት በቤቱ ውስጥ በባርነት መንገላታቱ እጅግ በጣም ተስፋ እያስቆረጣት ሲመጣ አንድ ቀን የመጣው ይምጣ በማለት በድፍረት ተነሳስታ ገነት የድምጽ መልዕክት ኢትዮጵያ ለምትገኘው እህቷ ትልካለች። በመልዕክቱ ገነት በየቀኑ የምታሳልፈው ስቃይ ለእህቷ ታደርሳለች። መልዕክቱ ከስልኳ ሳታጠፋው ኤሊያን ስልኩን ቀምታ በሰው አድርጋ መልዕክቱን አስተርጉማ ቅ።ቁጣዋ ተቀሰቀሰ። ገነት ስልክ ሁለተኛ እንዳትይዝ ተከለከለች። ኤሊያን እና ባለቤቷ ደብድበው የቤቱን ገመና ለሰው ብታደርስ እንደሚገሏት ተናገሩ።  

የኛ ድርጅት (ይህ ነው ሊባኖስ) ጉዳዩን መከታተል የጀመርነው በሚያዚያ 2014 ነበር። በሚያዚያ ወር የገነት እህት ወደ ድርጅታችን ደውላ በእህቷ ጉዳይ ትብብራችን ጠየቀችን። እህቷ እንደነገረችን ኤሊያን በስልኳ ካሜራ ገነት ገላዋን በመታጠብ ላይ እያለች እራቁቷን ፎቶ አንስታታለች። ገነት በቤቱ ውስጥ ያለደሞዝ እየደከመች ለባርነት መዳረጓ መረጃው ለውጪ ሰው ብታደርሰው ገነት እራቁቷን የምትታይባቸው ፎቶዎች ኤሊያን በማህበራዊ ድረ ገጾች ከመልቀቅ ወደኋላ እንደማትል መግለጿን ነገረችን። “እኛ ቤት ከባድ ጭንቀት ላይ ነን። እናታችን በየቀኑ ለገነት ድህንነት እንደሰጋች ነው። እኛም የምንፈልገው እህታችን በሰላም ወደ ሃገሯ እንድትመለስ ብቻ ነው።”   

የድርጅታችን ተመራማሪዎች ጉዳዩን መከታተል ጀመሩ። ከቤተሰብ ቃል ተቀብለን ያለውን መረጃና ሰነድ እጃችን ገባ። ልምድ ያላው የድርድር ቡድን አዘጋጀን። በባርነት ያሉት ኢትዮጵያውያን ነጻ የማውጣት ልምድ ያላትና ብዙ ልምድ ያዳበረች ሰራተኛችን ሌይላ የድርድር ቡድኑ መሪ አድርገን ሾምናት። ሌይላ በስልክ ኤሊያንና ባለቤታን አግኝታ ገነትን ነጻ ለማውጣት ድርድር ተጀመረ። 

ኤሊያን እና ገነት በአል ጀዲድ ቴሌቪዥን በቀረቡበት ወቅት

በድርድሩ ወቅት ኤሊያን እጅግ በጣም አስቸጋሪ አመል ያላት አደገኛ ሰው መሆኗን ቶሎ መረዳት ችለን ነበር። ሌይላና የድርድር ቡድኑ የገነት ሁኔታ አሳሳቢ እንደነበረም ቶሎ መረዳት ቻሉ።

“እኔ በስልክ ወደነ ኤሊያን በምደውልበት ግዜ የኤሊያን ስሜት ድብልቅልቅ ይል ነበር። አንዴ “የምትናገሩት ሁሉ ውሸት ነው! እጅግ በጣም አድርጌ ነው የምወዳት” ትል ነበር። ከዛ ከደቂቃ በኋላ ስልኩን እንኳን ሳትዘጋ ስትጮህባት እና ስትሰድባት እሰማ ነበር። እኔ እንደ አደራዳሪ ሴቲያዋን ለማረጋገት እጥር ነበር። ምክንያቱም ገነት ላይ ተናድዳ ጥቃት እንዳትፈጽምባት እሰጋ ስለነበር ነው። ሴትያዋ ጤንኛ እንዳልነበረች ግልጽ ሆነልኝ። ለኛም ቶሎ መረዳት እንደቻልነው ገነትን ከዛ ቤት በአፋጣኙ መውጣት እንደነበረባት ነው” ትላለች የአደራዳሪ ቡድናችን መሪ ሌይላ።

በድርድሩ ወቅት ኤሊያን ኩሪ በተደጋጋምሚ ገነት “እንደ ልጄ አድርጌ ነው ማያት” ብላናለች። ሆኖም ግን ደሞዟ ለምንድነው የማትቀበለው ባልንበት ወቅት መጀመርያ በደረቁ ክደው ገነት ሙሉ ደሞዟን እንደምትቀበል ነገሩን። ገነት ያልሰራችው ሁሉ ቀደም ብላ እንደምትቀበል ኤሊያን ተናገረች። ይሄንን የሚያሳይ ደረሰኞች ሁሉ በእጃችን አሉ ብለው ለአደራዳሪዎቻችን ገለጹ። ቆይተው ደግሞ የተናገሩትን ቀይረው ገነት ደሞዟን ያልተቀበለችው ሙሉው እስከምጓዝ እናንተ ጋር ይቀመጥልኝ ብላ ስለጠየቀችን ነው፤ ብለው ነገሩን። ስምንት ሚሊየን የሊባንኖስ ሊራ ወይ ደግሞ ወደ 30 ሺህ የኢትዮጵያ ብር ገደማ ተቀምጦላታል ብለው ተናገሩ።

በኤሊያን እና ጆኒ ቤት ለ4 ዓመት ከ8 ወራት የሰራችው ገነት እንደ ደሞዟ ሂሳብ ለደከመችበት መቀበል የነበረባት ወደ 10 ሺህ የአሜሪካ ዶላር ወይ ደግሞ ከግማሽ ሚሊየን የኢትዮጵያ ብር በላይ ነበር። የገነት ደሞዝ ሂሳብ አቆጣጠሩን ያጣረንበትን ለመመልከት ይሄንን ይክፈቱ።

አደራዳሪ ቡድናችን ገነት 10 ሺህ ዶላር መቀበሏን የሚያሳዩ ደረሰኞች ከኤሊያን ጠየቀ። ኤሊያን ከ2010 እስከ 2014 ዓም ወደ ገነት ቤተሰቦች የገንዘብ ዝውውር መፈጸማቸውን የሚያረጋግጡ በርካታ ደረሰኞች አስረከቡልን። ደረሰኞቹን በሙሉ ደምረን ኤሊያን እና ጆኒ በአጠቃላይ $2713 የአሜሪካ ዶላር ለገነት ቤተሰቦች ማስረከባቸውን ማረጋገጥ ችለናል (ደረሰኞቹን ለመመልከት ይሄንን ይጫኑ)።

ኤሊያን ያስረከቡልን መረጃ 4 ዓመት ከ8 ወራት ለሰራችበት ገነት ይገባት ከነበረው ደሞዝ 27 ከ መቶዉ ብቻ መክፈላቸውን ያሳያል። በአጠቃላይ ከአሰሪዎቿ $7287 የአሜሪካ ዶላር ወይ ደግሞ ከ 4 መቶ ሺህ ብር በላይ እንዳልተቀበለች መረጃው ያሳያል።

ቀሪው ገንዘብስ የት ገባ ብለን ለኤሊያን ጥያቄ ስናቀርብላት ቀሪው ገነት በእጇ ተቀብላ ሙሉውን ማጥፋቷን ነገሩን። ይሄ እንደ ምክንያት በአደራዳሪው ቡድናችን ምንም አይነት ተቀባይነት ያላገኘበት ዋንኛው ምክንያት ደግሞ በተደጋጋምሚ ከሰራተኞቻቸው እየዘረፉ የሚኖሩ አሰሪዎች ይሄንን እንደምክንያት ሲጠቀሙ ከመቶ ግዜ በላይ በመስማቱ ነው።

በሰኔ 2014 ዓም የኤሊያን ባለቤት ጆኑ ገነትን ይዞ ወደ ኢትዮጵያ ኤምባሲ ይሄዳል። ገነትን ይዘው የሄዱት የመኖሪያ ሰነዷ በመቃጠሉ ምክንያት ህግ ወጥ ሰራተኛን ቀጥራችዋል በሚል በህግ እንዳይቀጡ ነው። ጆኒ ዳውድ የሰራተኛቸውን ሰነድ አሳድሰው ይዟት ወደ ቤት ለመመለስ አቅደው ነበር። ነገር ግን የአደራዳሪው ቡድናችን ለኤምባሲው ጥቆማ አድርጎ ነበር። ጆኑ ገነትን ይዞ እንዳይወጣ ገነትን ወደ መጠልያ አስገብተዋት ጆኒን ከኤምባሲ አባረሩት።

ጆኒ ከኤምባሲው ከመባረሩ በፊት ገነትን ጎትቶ ለማስወጣት ብዙ ጥሮ ነበር። እኛ ግን ያለው ሰነድ እና ደረሰኝ ኤምባሲ ላሉት ሰራተኞች አድርሰንላቸው ነበር። ጆኒ ሰራተኛውን በባርነት ማንገላታቱን የሚያሳይ መረጃ አቅርበው አፋጠጡት። ሰውየው ማምለጫ እንደሌለው ሲረዱ ጥፋቱን ተቀብለው የገነት ቀሪ ደሞዝ ($7287 የአሜሪካ ዶላር) ለመክፈል ቃላቸውን ሰጡ። ቃል መግባታቸውን የሚያረጋግጥ የስምምነት ሰነድ ላይ ፊርማቸውን አኖሩ። ሆኖም ግን ከጆኑ ወይ ከኤሊያን የመጣ ተጨማሪ ክፍያ እስካሁን ለገነት እና ለቤተሰቦቿ አልደረሰም። ጆኒ ቃል የገቡትን ለማክበር ፍቃደኛ እንዳልሆኑ ግልጽ ሆኗል። 4 ወራት በመጠልያው ቆይታ ገነት በጥቅምት 2015 ምንም ነገር ሳትቀበል ወደ ሀገሯ ተመለሰች።

ሀገሯ እንደገባች ድርጅታችን ገነትን በሰፊው አወያቷታል። ሜላት የተባለችው የድርጅታችን ባለሙያ ገነትን በተደጋጋሚ በማግኘት በኤሊያን እና በጆኒ ቤት ውስጥ ስለነበረው ሁኔታ ሙሉ ሃቁን መረዳት ችላለች። ገነት ገላዋን በምትታጠብበት ወቅት አሰሪዋ መጥተው ፎቶ እንዳነሷት ገነት እራሷ አረጋግጣልናለች።

“ፎቶ ካነሳችኝ በኋላ እኔም በጣም ፈራኋት። ደጋግማ ትዝትብኝ ነበር። የምትጠይቀኝን በሙሉ እሺ እያልኩ የምፈጸመው የነበረው ሄዳ በቲክቶክ እንዳታዋርደኝ እያልኩ እፈራ ስለነበረ ነው።” አለችን።

ገነት በቤቱ አዲስ ተቀጣሪ ሆና እንደገባች ብዙ ሳትቆይ በአሰሪዎቿ መመታቱ እንደጀመረ ትናገራለች። ሆኖም ግን ይፈጸምባት የነበረው ጥቃት እጅግ በጣም መበራከት የጀመረው ከዓመት ተኩል በኋላ እንደነበረ ገነት ታስረዳለች። አልፎ አልፎ ኤሊያን የምታደርስባት የነበረው ድብደባ እጅግ በጣም ክፉኛ አቆስሏት የቲክቶክ ቪዲዮ ሁሉ ምቅረጽ የምታቆምበት ወቅት ሁሉ እንደነበረም ታስረዳናለች። በተለይ ኤሊያን በእጇ የምታደርገው የነበረው ቀለበት በገነት ፊት ጠባሳ እና ብልዛት ይተው እንደነበረ አካፍላናለች። ተቀጥቅጣ ፊቷ ደምቶ በምታለቅስበት ግዜ አልፎ አልፎ ኤሊያን “ፊትሽን እጠቢ ቀረጻ ልጀምር ነው” ብላ ትናገራት እንደነበረም ነግራናለች። አንዳንዴ ኤሊያን ይቅርታ ጠይቃ ሁለተኛ አይለምደኝም እያለች ታቅፋት እንደነበረ የምትናገረው ገነት እንደዚህም ሆና ቁጣዋ ከተነሳ ከደቂቃዎች በኋላ በጥፊ እና በቡጢ መማታቱን እንደምትቀጥል አካፍላናለች።

ከዛ ሁሉ ስቃይ በኋላ ገነት በሰላም ለሃገሯ በቅታ ቤተሰቦቿን ድጋሜ ተቀላቅላለች። በአሰሪዎቿ ላይ ክስ እንዳቀረበች የምትገልጸው ገነት እስካሁን ድረስ ምንም የተንቀሳቀሰላት ነገር እንደሌለም ጨምራ ገልጻልናለች። ዛሬ ገነት በራሷ ፍቃድ የ ይህ ነው ሊባኖስ ድረ ገጽ እና የማህበራዊ ገጾቻችን ላይ ያሳለፈችውን ሃቅ ለዓለም እንዲገለጥላት ጠይቃናለች።

እናንተም የቲክቶክ ቪዲዮ ላይ የሚታየው የነበረው ከውሸት ትርክቱ ጀርባ አንዲት ኢትዮጵያዊት ስላሳለፈችው ስቃይ አንብባችሁ ተረዱልን።

ዛሬም ቢሆን ለኤሊያን ኩሪ እና ለባለቤታቸው ጆኑ ዳውድ ከገነት የቀሙትን እንዲመልሱና የቀረው 7287 የአሜሪካ ዶላር እንዲያስረክቡላት ጥሪ እናስተላልፋለን።

የገጻችን ተከታዮች የሆናችሁ በተለይ በመካከለኛው ምስራቅ ላላችሁ የቲክቶክ ታዳሚዎች ኤሊያን ኩሪን በቲክቶክ “አንፎሎ” አድርጋችሁ የቤታቸውን ምስጢር ለዓለም እንዲደርስ ይሄንን ታሪክ ለምታውቁ ሁሉ ላይክ እና ሼር በማድረግ ተባበሩን። ጆኑ እና ኤሊያን ላይ ጫና በማሳደር ለገነት የፍትህ ትግሏን ድጋፋችሁን አሳዩ።

ማሳሰብያ፡ እዚህ በጽሁፍ የቀረበው ባለ ጉዳይዋ ገነት ሙሊሳ ቄጫ እራሷ ሁሉን አይታ ተቀባይነት እንዳለው አምና ታሪኬ በሰፊው ይጋራልኝ ብላ ታሪኳን እንድናሰራጭላት ፍቃዷን ሰጥታናለች።

______________________________

ይህ ነው ሊባኖስ እአአ በ2017 ተቋቁሞ በሊባኖስ የሰው ቤት ሰራተኞችን ለመከራና ለሞት የሚዳርጋቸው የካፋላ አሰራርን ለማስወገድ የሚንቀሳቀስ ድርጅት ነው። ዓላማችን የሰው ቤት ሰራተኞች የሚደርስባቸው በደል እና እንግልት ሰፊው ህዝብ የተሻለው ግንዛቤ እንዲኖረው መንቀሳቀስ ሲሆን በተጨማሪም በደል ፈጻሚዎችን ለፍትህ ማቅረብ እና ድርጊታቸው ለዓለም ማስተዋወቁ ላይ አትኩረን እንሰራለን። በዋናነት “ይህ ነው ሊባኖስ” በዚህ አሰራር ለሚሰቃዩ ሰራተኞች ድምጽ ለመሆን ነው የተነሳሳው። የአይን እማኝ ለሆኑት ሁሉ መጥተው እንዲተባበሩንም ጥሪ እናስተላልፋለን። 

ካፋላ ተብሎ የሚጠራው የመካከለኛው ምስራቅ የሰራተኞች አያያዝ ስደተኞችን ቀጥሮ ለማሰራትና በተለይ ከአፍሪካ እና ከእስያ ለመጡ ሰራተኞች በግል ቤት ተቀጥረው ያለ መንግስታዊ ከለላ ለአካላዊና ጾታዊ ጥቃት ተዳርገው ክስ ለማቅረብ የሚከለከሉበት አሰራር ነው። የካፋላ አሰራር ለግፍ ፈጻሚዎቹ ከለላ የሚሰጥ እና በሰራተኞች ላይ ጉዳቱ እንዲብስ ምክንያት ሆኗል። ስደተኞችን ለባርነትና ለህገ ወጥ ዝውውር አጋልጧችዋል።